حضر قفاك وياك وانت رايح تنتخب .. واعمل له عمرة لطيفة صغيرة .. مشى عليه الليفة وصلحه بالسنفرة .. عشان نشارك كلنا فى المسخرة .. واختار فلول أو عسكرى يللا رجعنا وره .. لا تقول برادعى ولا حمدين وأبو الفتوح يا راجل بلا حرية بلا كرامة بلا عدل دى حاجات فشخرة !!!!!!!!
حضر قفاك وياك وإياك تفرط فيه .. أصل القفا لو ضاع وشك تطول لياليه.. وتحط جزمة فى بقك ولا حد يسمع لك صوت .. ما انت طول عمرك ميت هنخاف عليك م الموت .. حضر قفاك وياك وإياك تفرط فيه ... وخد له صوره معاك أحسن تتوه معانيه .. للذكرى راح تفتكر الظلم اللى عشش فيه....
حضر قفاك وياك والبس بلوفر شيك .. وقميص بياقة قصيرة علشان تبان مآسيك .. فى اليوم ده بس الكل ف انتظار معاليك .. وبعدها يا جميل الدنيا تشمت فيك .. حتى اللى كان يستحى بكره يغلط فيك .. وبكره زى امبارح بالجزمة راح يديك.
مصطفى إسماعيل
ليست هناك تعليقات:
إرسال تعليق